No. 320 MAPORUS DO ARIAN

Verse 1

Maporus do arian, ma salpu hatiuron Di soluk haholomon, mambaen paradianan, di nasa jolma i Holom do di matangku, tu Ho do lao rohangku Sitompa parsorinan, ni ari dohot borngin, mamuji goarMi.

Verse 2

Girgir ma ho tondingku, mamuji Debatamu Ai na so habilangan do saluhut na denggan, binaenNa i tu ho, satongkin pe ndang salpu, so sahat tu tanganmu Godang denggan basaNa, nang asi ni rohaNa, na pangoluhon ho.

Verse 3

Ai songon siparmahan, manjaga di adaran Dorbia asa dapot, saluhut i na ringkot hangoluanna i Laos songon i Tuhanku, dilehon do bohalhu Tongtong do jinagaNa, au songon dorbianNa, dibaheni basaNa i.

Verse 4

Ndang au tinadingkonNa, hape pinatikkonNa Jotjot nilaosanku, sai lilu do rohangku, mambahen dosa i Asi rohaM Amangku, paombun ma rimasMu Tama do au toruan, alai na huarsakkon, sude pambaenanki

Verse 5

Tangihon ma hatangku, sai sesa ma dosangku Ai mudar ni AnakMu, i do paridianku, na paiashon au Sai dokkon suruanMu, marsaro di lambungku Ho ma tongtong donganku, di na lao nok matangku, nang di na hehe au.

Verse 6

I ma na hinaposan ni rohangkon, o Tuhan Umbahen sonang rohangku tumopot podomanku So humasusa au, ai ndang habiaranku Pangago ni musungku, dibaen habongkabongmu, na mangkuphupi au, mangaramoti au.